Mexillón de Galicia acode ao Galicia Fórum Gastronómico

Mexillón de Galicia estará presente no Galicia Fórum Gastronómico que se celebra en Coruña do 25 ao 27 deste mes de setembro.
Unha nova cita de alto nivel á que acode a DOP e que traerá a Coruña público profesional nacional e internacional. O fórum deste ano ten como tema central do seu programa a gastronomía sostible, ámbito no que Mexillón de Galicia ten moito que dicir ao tratarse dun alimento totalmente natural criado nas nosas rías coa única achega do fitoplancto mariño.
A DOP contará cun expositor propio, onde se mostrarán a empresas e profesionais os distintos formatos do mexillón, así como os produtos e marcas amparados polo noso selo de calidade. Ademais, os asistentes terán a oportunidade de gozar os tres días do seu sabor coas receitas que elaborará o cociñeiro Miguel Mosteiro.
Mexillón de Galicia continúa así desenvolvendo a intensa campaña de promoción destinada a reforzar o coñecemento e recoñecemento da nosa marca de calidade.